Angrerett

I nokre tilfelle angrar du på å ha inngått ein leigekontrakt. Kva kan du gjere då?

Har du inngått ein avtale om leige av bustad, så er du i utgangspunktet bunden av denne. Hovudregelen er derfor at du som leigetakar ikkje har ein angrerett.

Etter angrerettlova kan leigetakar i nokre tilfelle ha rett til å angre på leigekontrakten.

• Utleigar må vere næringsdrivande. Dette er vanlegvis ein som driv eit utleigefirma.
• Avtalen må vere inngått ved fjernsalg, eller utanom den faste forretningsstaden til utleigar

Fjernsalg er typisk ein avtale om leige av bustad som blir inngått via telefon, sms, eller e-post der utleigar ikkje ber om at leigetakar ser bustaden før avtalen blir inngått. Det er ein føresetnad at utleigar har lagt opp til å inngå leigekontrakten utan at leigetakar ser bustaden og ved telefon, sms eller e-post.

Fristen for å angre er normalt 14 dagar frå den dagen leigeavtalen blei inngått. Viss utleigaren, som er næringsdrivande, ikkje har opplyst om angreretten ved avtaleinngåinga, har du 12 månader og 14 dagar frå dagen etter avtalen blei inngått.

Angrar ein utanfor desse tilfella, er alternativa å seie opp kontrakten eller framleige dersom kontrakten ikkje kan seiast opp. Du er i utgangspunktet forplikta til å betale leige i oppseiingstida.

Angrerettlova gir berre forbrukarar moglegheit til å angre. Dette inneber at utleigar, uansett om det er ein profesjonell utlegar eller ein privatperson, ikkje har moglegheit til å angre på inngått leigekontrakt.

Dersom utleigar ønskjer å avslutte leigeforholdet må utleigar anten seie opp leigeforholdet, eller heve leigekontrakten. Det er eigne reglar for oppseiing og heving frå utleier. Det kan du lese om her.